Inés Mirás

O nome de Inés Mirás está vinculado dende 2017 a unha das bandas totalmente femininas máis recoñecidas do país, A banda da loba, na que toca a guitarra e coa que xa leva editados catro traballos discográficos. Mais o versátil talento desta música ordense, formada no conservatorio mais tamén en artes escénicas e produción audiovisual e de espectáculos, non se cingue a este proxecto, senón que abrangue outras facetas artísticas tan interesantes coma a composición e a creación de música para videoxogos.

Xosefa de Bastavales

Nun recuncho da mesma Bastavales á que cantaron os versos de Rosalía viviu sempre e aínda vive Josefa Juncal, máis coñecida como Xosefa de Bastavales para quen a reverencia coma unha das grandes iconas da nosa tradición musical. Xosefa, natural de Tordoia, aprendeu a tocar a pandereta sendo só unha cativa e durante toda a súa vida non deixou de entoar un vasto repertorio de cancións e cantigas populares que a converteron nunha parte indispensable da memoria viva da nosa música tradicional. O seu inesperado veciño, o músico Manu Chao, levouna con el de xira a finais da década de 1990, logrando así que o espírito da tradición puidese fusionarse con novas tendencias melódicas coma o rock bravú.

Bouba

Co propósito de defender e revivir en cada foliada o legado musical das que antes ca elas cantaron, tocaron e bailaron, tres mulleres de Ordes (María, Carme e Maca) fixeron confluír os seus talentos en Bouba. O seu vasto coñecemento da música tradicional e das pezas populares levou a este grupo de cantareiras e pandeireteiras polas troulas de toda Galicia e tamén a outros encontros alén das nosas fronteiras. Despois de dez anos de traxectoria, gravaron o seu primeiro disco, titulado Vinculeiras, en 2017 e agora traballan no seu novo proxecto Termando dos marcos.

María Prado

Dende as súas primeiras notas coa Banda de Música de Ordes ata as intensas xiras polos escenarios galegos na actualidade con MJ Pérez, a Banda Xangai ou Loita Amada, María Prado percorreu moitos camiños: en sentido literal, ao volante dos buses da empresa familiar, e tamén en sentido figurado, buscando prender na rapazada unha semente de amor pola música a través da docencia. Mais sempre unida á súa inseparable trompeta, que a converteu nunha imprescindible da nosa escena e coa que se uniu a moitos proxectos, tamén á primeira brassband galega integramente feminina, Brassica Rapa.

Laura Romero

Falar de Laura Romero é falar de arte e compromiso, un talento interdisciplinar que navega entre ilustracións e melodías na busca de novos discursos. Aínda que se formou en belas artes, a música sempre tivo un oco entre as súas paixóns e tocou o baixo en grupos como The Coy Kois ou Velvet Rain ata chegar en 2016 á banda decana do rock galego, Zënzar. O seu amplo coñecemento da escena galega, na que tamén destaca como baixista de MJ Pérez e Cuarta Xusta, levouna a impulsar o proxecto Músicas Galegas Ilustradas, co que trata de visibilizar o talento musical feminino da nosa terra mediante a ilustración dixital.